Qualifiziërig vo me Banquier.
Es Gsprèuhch vom Reubi Raab, em Hàini Habicht ound em Chàschpi Cheuïzli.
Hàini Habicht: Am Wéff séig schynts àine vo déne–n Amèrikaanische Banquié, syni Bank hàt aw muëse ggréttet wèrde, séi dèè schuuli arogant ouhftràtte, wië wànn èr en Sibesiëch wèèr.
Reubi Raab: Daas isch doch tupisch. Dië tànked doch blos, wië si cheuned na méé Miljoone ysacke. Hàt neud de Vasélla erchlèèrt, èr héig sàlpverstàndtli syni zwoo Miljoone verdiënt ? Schliëssli héig er aw de–n Akzjonèère e gouëti Dividànde cheune ouhszale.
Chàschpi Cheuïzli: Daas bringt mi–ch ouf e Fraag; waas wuured Yr vo me Bànkler erwaarte ound uber ihnn wéle wusse, wàn er muëssted en Sy-y-o fur e Bank ouhslàse ?
H.H.: Daas isch gaar neud so àifach. Er mouë natuurli scho cheune mit Gàlt oumgaa.
R.R.: Jaa, gschyd mouë–n er natuurli scho sy.
H.H.: Er mouës cheune es Risiggoo apschètze. Neud das er p'Bank in Apstourz faart.
R.R.: es kalkouliërts Risiggo mouë–n er glych ygaa. Schliëssli mouë dië Bank ràndiëre.
Ch.Ch.: Ych tànke–n a ganz euppis anders.
R.R.: Fuërigsqualitèète. Er mouë sych cheune douresétze.
H.H.: Béziëige, hàissts, muë–n er aw haa.
Ch.Ch.: Yr hànd sicher bééd zwéé ràcht, aber daas sàged s' ja sàlber, zoum cheune iri Boni vertràtte. Aber, waas màined Er, isch dië Wàltwirtschaftskryse neud droum choo, will jéde hàt wéle schlawer sy wéder der ander ? Hànd dië iri Intéligànz neud ygsétzt, zoum mit oundoursichtige Dérivaate schongliëre ound Hupotééke zou Mogelpàckli schnuëre ?
R.R.: Ahaa … aber drouhs choo mouë soo àine scho.
H.H.: Ych sàge ja, er mouë cheune syni Grànze kàne, also soo han i 's ggmàint.
Ch.Ch.: Ych find halt doch, mit all dèm wéle gschyd sy, wéle pfiffiger ousefinde, wéle tifiger zouëpacke, woo na euppis cheunnt Ggwunn bringe, mit all dèm isch doch blos dië Gyr nach na méé ound na méé aagstachlet worde, isch es Ubervoortàile–n aaggange, ound am Ànd es Pschysse.
H.H.: Hàsch neud ouràcht. Èumel dië Wégelynbank isch wàge Gsétzesubertràttig z'Ground ggange.
R.R.: Stimmt scho. Aber àifach isch daas neud. En béruëmte Wirtschaftswusseschafter, de vo Hàjék, findt Stuurprogràssjon oundémokraatisch, will e Méérhàit e Minderhàit zwingi fur euppis, wo dère Méérhàit sàlber neud wéé touët.
H.H.: Jàà, fintsch es neud oummoraalisch, es Ouràcht mit Hinderzië wéle kompànsiëre ? Ound was sàisch zoum Libor–Pschiss ?
Ch.Ch.: Daas isch en anderi Fraag. Jétz aber zrougg zour Qualifikazjon. 'S wichtigscht vo me–n oberschte Bankeschéff tounkt mych de Charakter: Éérli, ouhfrichtig ound zouëverlèuhssig. I dèm mouë–n er es Voorbild sy fur syn ganze, groosse Lade.