Griëchestroom
Es Gsprèuhch vom Chàschpi Cheuïzli mit em Xaver Pèrthé.
Chàschpi Cheuïzli: Dou, Xaver, sit Jaare gheuhr i–ch imer, g'Griëche muësid spaare, daas nutzt doch nuut.
Xaver Pèrthé: Griëcheland isch ébe verschouldet.
Ch.Ch.: Aber, isch daas neud gspàssig ? daa wèrded imer wider Miljarde–n Euïro i daas Griëcheland inepboumpet, ound 's gaat jé méé déschto myser. Dië Schoulde wèrded doch soo nou greuhsser statt chlyner.
X.P.: De Staat mouë–n ébe syne Verpflichtige naachoo, zoum Byspyl Leuh zale fur 's Neuhtigscht. Ooni dië Miljarde muësstid g'Griëche nou na heuhcheri Zéise zale.
Ch.Ch.: Mych tounkt daas neud loogisch; es wirt gspaart fur Gàlt wàg de Schoulde ound dië wèrded imer greuhsser. Dië Miljarde–n Euïro verschwinded doch i me Loch ! Sàit me neud, de Staat muës antizuklisch agiëre ? Also prodouziëre, Gàlt muësst doch ràndiëre !
X.P.: Sàb schoo, aber wànn kà Gàlt oume–n isch, cha me neud prodouziëre.
Ch.Ch.: Gàlt isch ja oume, mit ere Miljarde–n Euïro sétt me màini eppis cheune–n ouf p'Bài stéle wo ràndiërt.
X.P.: Invéschtiëre wott niëmer bi dèèwààg instabyle Verhéltniss.
Ch.Ch.: Woo isch dànn t'Stèrchi vo Griëcheland, woo hàt daas Land syni Ressoursse ? uberhawpt dië ggwagglige Lànder im Suude ? Dië hànd Soune, Wind, Méér, ound wàltwyt brouhcht me–n Énèrgy.
X.P. Wië stéllsch der daas voor ?
Ch.Ch.: Tànk nou an ali dië Windmulene–n ouf Mukonos, an ali dië Insle mit ire–n Ouhfer, a dië Bèrge mit ire Sounehàng.
X.P.: Waas wottsch demit ?
Ch.Ch.: Ébe, mit dèm Réttigsschirm séled doch dië Euïrostaate–n i Griëcheland Solaarchraftwèrch, Windtourbyne ound Chraftwèrch mit Wàlenénèrgy bowe–n ound bétrybe–n ound de Stroom verchawffe.
X.P.: Daas bysst si–ch aber mit em Tourismous. Apgséé devoo sind Ébbé ound Flouët ounbéduutend im Mittelméér.
Ch.Ch.: Me brouhcht ja dië Windréder neud grad z'Mukonos hèrestéle ound Chraftwèrch neud a de béschte Badéstrànd. Wàge Solarzàle–n ouf de Tàcher cheumed t'Tourischte–n àinewààg glych.
X.P.: Ound wèr séll all daas bétrybe ?
Ch.Ch.: Fur daas hàt's gopel ggnouëg Arbetsloosi, sicher aw gschydi Luut, Èèschénjeuhre, Fuusiker, wo–n allwààg froo wèèred, fur chlyni Leuh go schaffe, wànn s' wénigschtes euppis vernumftigs z'touë hànd, statt blos ouf mageri Arbetslooserànteli oder gaar nuut aaggwise sy.
X.P.: Daas chasch vergàsse wàge de Ggwèrchschafte.
Ch.Ch.: Dou hàsch ja gàg ales ound jédes en Ywand !
X.P.: Nou, wil i p'Probléém gséé.
Ch.Ch.: Yverstande, Probléém mouë me gséé, aber sààb isch nou dië halb Arbet; Probléém leuhse mouësch cheune.
X.P.: Es isch ébe wurkli–ch e vertrackti Sach, es git e kàn Ouhswààg.
Ch.Ch.: Dou, ych glawb, dië Kryse–n isch kà Schouldekryse, daas isch e Péssimismouskryse. Mit all déne Miljarde–n Euïro fèèlt's neud am Gàlt, es fèèlt a Vertrowe, a Sàlbschtvertrowe, a Inizjatyve ound Mouët. Wà me louhter Probléém gséét, wurgt me–n ali Idééë blos ap, ound 's Gàlt verschwindt na lang im Schouldeloch fur nuut ound wider nuut. Daa fèèlt's màini am kritische–n Optimismouss.