Kossorpsk
Es Gsprèuhch vom Reubi Raab mit em Oskar Tsé.
Reubi Raab: Dië hànd ja wider tdaa wië tollwuëtig Affe–n i dèm Sèrbje; e vercholeti Lych i–r U.S.Bootschaft, Verlétzti, ound uberhawpt, i freumdi Ggsandtschafte–n ydringe go plundere, daas isch doch es primityvs Sawpack, dië Balkanéése !
Oskar Tsé: Dou schynsch ja zimli ggràizt. Cheunnt’s neud sy, das t’ e chli uber ’s Zyl ouhs schuussisch.
R.R.: Hà jaa, findtsch dou dië Réakzjon neud aw ounder alem Hound ? Soo gaat me doch neud oum mitenand ounder zivilisiërte Veulcher.
O.T.: Dou rédtsch vo de Réakzjon i Sèrbje ouf t’Ounabhàngigkàitserchlèèrig vom Albaanische Kossovo. Zou dère stéled sych glawb i verschideni Fraage. Wànn dou yverstander bisch, louëge mer dië doch zàme–n aa.
R.R.: Moll, schoo, mych nimmt’s doch à wounder, was dou dezouë tànksch.
O.T.: Àigetli wétt i myr sàlber zéérsch klaar wèrde druber. Dou rédtsch vo Réakzjon, ound daas isch imer Réakzjon ouf euppis. I dém Fall isch es dië offiziéll Erchlèèrig, de Kossovo séig ounabhàngig, daas hàisst, ggheuhri nume zou Sèrbje ound im Fall vo de–n U.S.A. t’Anerchànig vom Kossovo als àigenem Staat. Ych finde, mer muëssted daa aafange. Waas glawbsch dou, waas béduutet daas fur Sèrbischi Patriote ?
R.R.: Ahaa, wië séll i sàge ? E Bélàidigoung ? En Verraat ? Si fuuled sych im Stich gglaa ?
O.T.: Ych glawb, vo–n alem cheunnt euppis deby sy. Waas sàged t’Sèrbe sàlber dezouë ? Ych tèurff glawb neud so allgémàin frèuhge: waas sàged dië Rédner a de Démonschtrazjon ?
R.R.: Kossovo ggheuhri zou Sèrbje fur imer ound ééwig.
O.T.: Wië bégrunded s’ daas ?
R.R.: T’Sèrbe hànd glawb vor X houndert Jaare déét, also ouf em Amslefàld, e Schlacht verloore ?
O.T.: Ound waas macht daas ouhs ?
R.R.: Ahaa, dou màinsch, de Kossovo séig ’s Hèrz vo Sèrbje.
O.T.: Soo ha–n ych ’s aw ggheuhrt. Cha me–n also sàge, dië Luut séiged in ere Hèrzesaagglàgehàit verlétzt ?
R.R.: Wàge dèm tèurff me doch neud e dèèwààg touë !
O.T.: Daa hàsch dou sicher ràcht. Aber sind wàge dèm ali Balkaanveulcher es primityvs Sawpack ?
R.R.: Èumel t’Sèrbe sicher !
O.T.: Wàisch dou dànn, eub ali Sèrbe mitggmacht hànd a déne ounentschouldbaare–n Ubergriff, oder scho nou, eub ali demit yverstande sind ?
R.R.: Gouët, es isch offebaar en Houhffe Randaliërer ggsy, ound anderi Sèrbe hànd dië glawb verourtàilt. Aber bi–n euïs chèèm soo euppis nië voor.
O.T.: Isch neud euppis èènlis i de Schwyz paajert ?
R.R.: Ych bi paff !
O.T.: Isch neud ’s Ruutli fur euïs Schwyzer so euppis wië ’s Hèrz vo de Hàimet ?
R.R.: Waas wottsch demit sàge ?
O.T.: Es hàt doch e zimlichi Ouhfrégig ggèè oum p’Fraag, eub daas Ruutli tèurffi vo pstimte Grouppe fur sych in Aasprouch ggnaa wèrde, séiged daas Ràchtséxtréémi, séiged daas Frawe, séig daas p’Màinig vo pstimte Boundesrèuht, ound hàts daa neud ounscheuhni Réakzjoone ggèè ?
R.R.: Aber èumel kà Tooti.
O.T.: Gouët. Jétz stéll der voor, wië ’s wèèr, Sèrbe chèèmted, oder Amèrikaaner, ound erchlèèrtid, daas Ruutli gheuhri jétz ine ?
R.R.: Daa nèèmt ych na ’s Stourmggwéér ous em Chaschte–n ound marschërti i t’Inerschwyz. Aber soo euppis cha’s gaar neud gèè, schliëssli isch ’s Ruutli zmittst im Land ound neud a de Grànze.
O.T.: Daas hoff i béstimt. Gisch dou myr ràcht, wànn i sàge, dië Ubergriff vo déne Randaliërer cheu mer verstaa, aber neud entschouldige, es sind aber Taate vo me verglychswys chlyne Houhffe, wo me neud ’s ganz Land tèurff in àin Topf gghéje–n ound verourtàile.
R.R.: Euppis béschàftiget mych scho na. Dië Rédner hànd doch ’s Volch ouhfghétzt, ound zwaar heuhchi Politiker. Dië hànd doch muëse wusse, waarschynli wéle, das ’s chleupft.
O.T.: In ere Hèrzesaagglàgehàit réagiërt na mànge–n éxtréém, me cha nou hoffe, das dië Mane wider zour Vernoumft cheumed. Waas sàisch zour offizjéle Réakzjon vo Sèrbje ?
R.R.: Dië hànd ja na iri Bootschafter ous ale Lànder apzoge, wo–n en ounabhàngige Kossovo anerchàned. Daas isch doch àifach treutzlet.
O.T.: Glawbsch neud, Sèrbje mouës sych dèè Schritt na uberlégge, wànn imer méé Lànder dië Ounabhàngigkàit vom Kossovo anerchàned.
R.R.: Dànn wèrded s’ allwàg séér isoliërt.
O.T.: Ubrigens, t’Sèrbe hànd ire Bootschafter aw ous Bèrn apzoge. Waas màinsch, isch daas gschyd ggsy vom Boundesraat, Kossovo als ounabhàngige Staat anerchàne ?
R.R.: Ych glawb, dië hànd neud anders cheune. Euïsi Ousseminischteri sàlber hàt doch scho lang ouf en ounabhàngige Kossovo hyggschaffet. Dië wèèr scheun bleuhd daagstande, wànn t’Schwyz jétz ggsàit hétt, Kossovo muës Sèrbisch blybe.
O.T.: Gouët, aber p’Fraag stéllt sych glych. Schliëssli staat aw Roussland ouf em Standpounkt, en Ounabhàngigkàit ooni Ywiligoung verstoossi gàg Veulkerràcht.
R.R.: Daa kànn i mi zwénig ouhs.
O.T.: Zour Anerchànig vo me Staat verlangt ’s Veulkerràcht viër Bédingige: 1. es pstimts Gébiët 2. mit ere pstimte Béveulkerig, 3. p’Beràitschaft, mit de Veulkerggmàinschaft zàme schaffe–n ound 4. ’s Yverstàndtnis vo de Veulkerggmàinschaft. Wië gséésch dou daas ?
R.R.: Dië éérschte bééde Bédingige sind erfullt, dië zwàit sàit dië Kossovarisch Régiërig sàlber, si wéled zàmeschaffe, eub ’s es dànn mached bi–n i neud e so sicher ound dië dritt Bédingig wàiss i neuhd. Es wirt droufaa choo, eub t’UNO dië Anerchànig sankzjoniërt.
O.T.: Ych ha–n aw scho ggheuhrt sàge, i de Jourischteréi cheun me–n ales béwyse, aw ’s Gàgetàil. Aber glych namaal, findsch dou ’s gouët, das de Boundesraat de Kossovo als ounabhàngige Staat anerchànnt hàt ?
R.R.: Myr hànd ja vorane vom Hèrz ggrédt. Als fréje Schwyzer find ych, jédes Volch sétt doch tèurffe sàlber pstime, woo ’s wétt dezouë ggheuhre, ound dass g’Kossovo–Albaaner neud wànd zou Sèrbje ggheuhre, nach alem was s’ offebaar vo Sèrbe hànd muëse douremache, verswtaa–n i. Droum mag i de Kossovo–Albaaner t’Ounabhàngigkàit goune, so lang s’ iri Minderhàite schutzed.
O.T.: Verstaa–n i di ràcht, so tounkt dych na màngs ousicher.
R.R.: Vilicht wèèrs gschyder gsgy, me hétt na chli ggwaartet bis me ggsèch, wië sych ales entwicklet.