Souneliëd
Nië wuur mi trowe, wië soo vili Dichter, pèr Dou mit de Soune
(Ounvorstéllbaar hàissi Gaas–chougle, Wasserstoffwandlig zou Hééljoum),
Nië trowti mych mit de Soune vertrowli go schwàtze pèr Dou.
Séll i si loobe–n ound bàtte zou ire wië vili daas tdaa hànd ?
Uberhawpt réde zou ire, dèm hitzige Gaasball, so wyt wègg ?
Hàt si dànn Oore zoum gheuhre–n ound lost si ouf mych chlyses Punktli ?
Hétt si na Oore zoum gheuhre so cheunnt si mi neud emaal gheuhre.
Gheuhr i doch sàlber kàn Moux vo gigantische–n Éxplosioone
Wo si–ch ouf ire–n eràigned ound Maasse–n i 's Lèèr ousespeuïzed.
Louhtloos verblaast si de Sounewind, 's trifft e kàn Toon t'Stratosfèère.
T'Sounn hàt dië Èrde, dèè Bode wo myr mit de Fuësse drouff tschalpet
Ous irem Kèurper géboore, in louftlèère Rouhm ouse ggworffe,
Hàt ere grad na de Zwick ggèè so das si sych trullt oum si sàlber.
Glych laat si t'Èrde neud loos (wië–n e Mouëtter de Soon màngisch phuëtet).
Wië–n a de Làine, im stéétige–n Apstand, trullt t'Èrde–n oum t'Soune,
P'Maassenaaziëig (de Fuusiker misst si ound cha si béràchne,
Wèr aber cha si bégryffe, daas Rèètsel na leuhse: "waroum ?),
P'Maassenaaziëig macht 's Klymaa ouf Èrde konschtant ound ertrààgli.
Gsàit wirt gédankeloos: "t'Soune gaat ouhf" oder "t'Soune gaat ounder".
Glych das mer wussed, si sàglet als Stèrn zwusche zaalloose Stèrne,
Àine vo ix Miljarde, verbounde dour Chréft i me Wurbel;
Dèè isch es Ggramsel vo Stèrne, wèr wétt 's ooni tschoudere tànke ?
Àinewààg hétt's fur na houndert Planééte, aw touhsig, na Spatzig
Zwusche zwoo Soune wo nàbenand schwàbed im Founkle vo–r Milchstraass.
P'Milchstraass isch sàlber aw àini vo vile, wië vile, wàiss niëmer.
'S Wàltall, daas dèèni si–ch ouhs, aber 's wèrdi neud tuner, 's gèèb stàndig
neuji Matéérje, aw daas isch es Rèètsel wo–n ounleuhsbaar schynti.
Àinewààg, euïs sàlber, ales wo 's git ouf de–r Èrde git's noume
Wàge de Soune, dië ganzi Matéérje, dië ganz Énérgy aw.
Ali Matéérje séig Brouchstouck vo fruënere Stèrne, aw t'Soune
Sàlber, ound ales séll àinzig ous àinere Form Énèrgy choo.
Tuuff i de–r Èrde verborge isch en Chèrn, ounerforscht was er sy mag,
Waarschynli hàissi Matéérje wo–n apgspickt isch vo–n euïser Soune,
Jédefall séigs Énèrgy vo de Soune, so tànkt me, ound t'Hitz wo
Stàimaasse chocht zou re Laava ound speuïzt ous Voulkààne, wo Dampf aw
Sprutze laat ous déne Géisyr, willkoumnigi Soole–n ound schwàflig
Hàilquàle wèrmt ound laat sproudle, dië Hitz isch es Gschànk vo de Soune.
Làbe gèèbs kàis ooni Wèrmi (daas hàisst Énèrgy), scho dië éérschte
Chlynschtlàbéwàse sind dank Énèrgy nou–r entstande, ound ales
Làbig gits ouhsschliëssli dank Énèrgy, séigs chéémischi oder
Wèrmi tiràkt ous de Soune, vo Pflanze verwandlet ound ggfràsse,
Quèèr dour dië Chétti vom Opfer zoum Rawbtiër bis oufe zou–n Màntsche.
Àinewààg, euïs sàlber, ales wo 's git ouf de–r Èrde git's noume
Wàge de Soune, dië ganzi Matéérje, dië ganz Énèrgy aw.
Abhàngig simer vo–r Soune–n ound grooss sind dië Rèètsel, zoum stouhne,
Màngs isch békannt ound a vilem wirt ggforscht, doch mer wussed na méé neuhd.
Daa cha me stouhne–n ound danke, me wàiss wéder wèm na aw waasem.
Nài, sone–n oungghuuri, ounglawbli hàissi ound rysigi Soune
Trow i mi neud goge douhze zoum ire go Bleuhdsinn verzéle.