Zwangsernèèrig
Es Gsprèuhch zwuschet em Hàini Habicht ound em Reubi Raab, spèuhter chounnt na de Chàschpi Cheuïzli dezouë.
Hàini Habicht: Salu Reubi, hàsch daas ggheuhrt ? Jétz muënd s' dèè Hamfpouhr zwangsernèère, fur das s' en cheund yspéére.
Reubi Raab: Jaa, ound ? Wànn 's Boundesggricht ggourtàilt hàt. Schliëssli muënd sych aw t'Walisser as Gsétz halte.
H.H.: Aber dèè Hamfpouhr wott liëber stèrbe, als is Chéfi.
R.R.: Bisch sicher ? Dèè wott doch blos i p'Méédje choo.
H.H.: Jàà nài, dèè màint's schynts èrnscht. Ych verstaa daas Ourtàil neud ganz. Jétz isch dèè Hamfpouhr ja mit ere Fouëssféssle i Houhsaràscht.
R.R.: Daas gaat natuurli neuhd. Me tèurff neud e soo oumspringe mit em Gsétz. Wànn euïsi Ggricht e dèèwààg aafeund, so gilt am Ànd kàs Gsétz méé fur ali glych.
H.H.: Me cheunnt en ja syn Houngerstràik bis as Ànd dourezië laa.
R.R.: Daas gaat neuhd, souscht wèèr daas ja wië–n e Toodesstraaff, ound dië isch apgschafft i de Schwyz. Jétz hànd s' ja sogar iri Inizjatyve zrouggzoge, dië wo finded, me séll de–n Opfer méé Ràcht gèè, neud de Tèuhter.
H.H.: Aber dië Zwangsernèèrig laat si ja gaar neud douresétze. T'Teukter sàged, iri éérscht Pflicht séig de Wile vom Pazjànt réspàktiëre, souscht cheunid s' ypacke. Wànn àine ourtàilsfèèig isch ound wott stèrbe, so gàlti syn Wile ggnaw soo.
R.R.: I dèm Fall staat 's Intràsse vom Staat gàg de Wile vom Délinquànt. Dèè spéérti me ja àinewààg gàg syn Wile–n y, wànn er t'Jouschtiz neud wuur erpràsse.
H.H.: Mag sy, aber t'Teukter mached daa neud mit, ound dië séll ound cha me neud zwinge, find ych.
Daa chounnt de Chàschpi Cheuïzli: Daas isch ja gaar neud neuhtig.
H.H.: Wànn dië neud wànd !
R.R.: Wànn en Aarzt vom Staat aagstéllt isch, zoum Byspyl en Ggrichtsmédizyner, so isch dèè Hamfpouhr ja neud tiràkt syn Pazjànt, also hàt er kàn Vertraag mit em, woll aber mit em Kanton.
C.C.: Jétz losed emaal. Wo–n ych vernaa ha, es findi sych kàn Tokter fur soo–n e Zwangsernèèrig, daa han i grad muëse lache. Myr isch nàmli–ch àine–n in Sinn choo, wo–n i vor fuffzg Jaare gchànnt ha, en Médizynstoudànt ound en Spassvogel. S' hànd em nou de Briëggi ggsàit. Dèè hàt sych euppe–n als Burgerschréck ouhfgspillt mit de Phawtig, èr schrybi syni Diss zoum Théémaa: Der Analcoitus in seiner Bedeutung als Nährklistier".
R.R.: Jàà, ound ?
C.C.: Fur es Klischtiër brouhcht's doch kàn Tokter ! Daas hàt myr sogaar myni Mame ggmacht, wànn si 's neuhtig ggfounde hàt.
H.H.: Ound wië stéllsch der daas voor ?
C.C.: Also, de Délinquànt lyt i syner Zàle, mager wië–n es Skélétt ound scho zimli schwach. Daa chounnt e résolouhti Polizischtin ine, hinedry viër Polizischte. Heufli sàit si "gruëzi Hèr N., Wië Si ja wussed hàt 's Boundesggricht entschide, das myr Ine muënd 's Àsse–n ygèè, wànn neuhtig aw mit Ggwalt. Daas béduutet, das myr dië ounggfreuït Ouhfgaab hànd, Ine es Klischtiër z'gèè." De Hamfpouhr sàit énèrgisch, wànn aw mit schwacher Stimm, soo euppis chèèm gaar neud i Fraag; aber p'Polizischtin: Myr hànd tdànkt, das Sy en anderi Leuhsig voorzië wuured ound Ine droum es fàins Àsse mipbraacht. Wànn Si daas jétz vor euïse–n Awge verspysed, so erspaared Sy Sych ound euïs dië ounaaggnèèm Prozédour. Oum t'Naarigsouhfnaam oume cheumed Si ouf kàn Fall." De Bétroffnig wéért si natuurli. Daa packed en dië Polizischte, zwéé an Èrm, zwéé an Bàine, ound féssled en ouf de Schrage. Dànn ziët em p'Polizischtin t'Hose–n abe–n ound stoosst em de Schlouhch is Fudli, bis er gouët sitzt. Dànn macht si de Phélter mit em Nèèrbréi heuhch obe–n ouf de Stange féscht ound louëgt, das de Schlouhch neud ouseroutscht, bis de ganz Bréi inegflosse–n isch.
H.H.: Daas isch doch broutaal !
R.R.: Soo gséét ébe Zwang ouhs.
C.C.: Ych wusst neud, wië de Tokter cheunnt Zwang aawànde ooni dèè Houngerstràiker z'uberwàltige. Aw wànn er em wétt es Schluuchli dour t'Nase–n yfuëre, brouhchti èr t'Hulff vo Polizischte, ound zoum en mit ere Sprutze béteuïbe grad aw. Bééd Métoode wèèred ubrigens na ééner ggfèuhrli, scho wàg em versticke. E Vééne–n aastàche zoum e Zouckerleuhsig inelawffe laa, sàb tounkti mych àinewààg en Bleuhdsinn.