Gglinge
Waarschynli–ch i sym Sééleschmàtter macht de Wolf en Patzer bim Voorspyl fur en Platz i me renomiërte–n Orchéschter. Dèè Poschte chounnt er neud uber. Isch dèè doch en Pàchvogel ! Wo–n er syni Niderlaag e chli verschmèrzt hàt, gglingt's em imerhy bi me Sumfonyorchéschter vo–n ere wéniger béduutende Stadt.
Ounverhofft chounnt er Poscht ous de–n U.S.A. uber. T'Véra ouf Plattjen schickt em es maschine-gschribnigs "Rundschreiben an alle, die mich mögen" vo dréi Syte–n uber iri Erlàbnis i New York. Am Schlouss schrybt si na vo Hand ganz spézjéll liëbi Gruëz ound 's nèèm si wounder, wië's em gèung. Nametli–ch ouf daas Poschtskript abe–n entschluusst er sych, dië stràbsami Jourischtin i de Freumdi na waarm z'phalte–n ound wott ere mindischtens jéde Monet en lange Briëf schtybe, was er dànn aw zouëverlèuhssig macht. E dèèwààg i de Schwàbi, cha–n er si neud ouhfraffe, si–ch èrnschthaft oum wyteri huraatsfèèigi joungi Daame go béwèrbe, wànn 's aw lang gaat, bis er i me Briëf vo de Véra cha làse, si freuji sych ouf es Widersèè dehài; dànn ound dànn cheum si am Floughafe–n aa, ousser–t ihmm wussi 's niëmer. Natuurli gaat er si go abhole. De Fluuger hàt Verspèuhtig, chounnt schliëssli aa, de Wolfgang louëget gspannt dour dië Glaas–Schybe, wo p'Passaschiër dehinder inestreuhmed, gséét verschideni éléganti Daame, aw dèrig wo winked, mouës aber es paar Maal anelouëge, bis er t'Véra erchànnt. Wo si dànn nach de Grànzkontrole–n i t'Hale–n ouse chounnt, stouhned sych bàidi zéérscht emaal verlàge–n aa, vor 's zou–n ere–n Oumaarmig chounnt. Aw wàret er si zou ire hài béglàitet, fuult me sych nanig so vertrowt wië–n amig; si hàt natuurli–ch aw jet–lag, aber me macht ap, me wéli sych télifoniëre. Es erwyst si ir Wyteri, das de Wile zou Flyss ound Erfolg dië bàide stràbsame Wàse–n allwàg sogaar na méé verbindet, als dië maagischi Macht, wo magnéétisch dië mànschliche Ggmuëter aaziët ound erfullt mit dèm maanische Ggfuël, me gheuhri enand als Fraw ound Maa. T'Véra tritt nàmli–ch in es béduutends Aavalts–Kolàktyv y, wo si mànge–n Aabig bis i t'Nacht ine na kniffligi jouristischi Fraage fur en strànge Schéff mouës wàlze; ound de Wolf isch nàb syne vile–n Aktivitèète–n i Schouël ound Orchéschter àinewààg am uëbe. Wo sych daas Paar nach vile Meunete fur e féschti Verbindig entschluusst, wunsched dië réschpàktyve–n Éltere–n ouff Plattjen ound Abderhalde–n ire–n erwachsene Chind vo Hèèrze–n ales Gouëte; waas hétted s' aw souscht wéle sàge ? Ouf bééde Syte hofft me–n ouf Ànkel, aber nachdèm 's ouf de Hoochsigràis neud yggschlage hàt, waartet me–n aw spèuhter vergàbis ouf Aazàiche vo Familje–Naachwoouchs. T'Véra erwyst si–ch als ouhsgsproche tuchtigi Aavàlti ound verdiënt Heuï wië Gàlt. Daa sàit ggwuss Màngi: "De Wolfgang isch halt glych en Gluckspilz !". Èr alerdings bringt's bi–n alem flyssige–n Uëbe zou kàm groosse Rouëm, ound syn Éérgyz blybt ounbéfridiget.
Mousiker mit irem heuhch entwicklete Ggheuhr, mit irer Bégaabig fur Rutmouss, fur Mélodye, gàlted allgémàin als tuuff empfindsam, vili aw als matémaatisch bégabt. Màngi sind bégàischtereti Mousykpèdagooge, aber nou wénig bringed spézjéli Freuïd ound Fèèigkàite–n a Màntschefuërig ound Verwaltigsouhfgabe mit. Wo de Poschte vo me Mousigschouëltiràkter fréi wirt, psinnt si de Wolfgang Abderhalde–n ouf syni Handelsmatour uond màldet sych. Zwaar isch em neud ounbékannt, das er si–ch oum en oundankbaare Poschte zwusche Hamer ound Ambooss, zwusche–t de voorgsétzte Phèurde–n als Hamer, wo–n irersyts méé oder wéniger douhrend vo spaarsame Politiker in ire Muglichkàite–n ygschrànkt wirt, will me kà Gàlt voorig héig fur koultouréli Intràsse vo–n ere Minderhàit, ound eme–n Ounderrichtspèrsonal als Ambooss, wo kà Louscht hàt, fur en Houngerloo i veulig ounggnuëgende Ruumlichkàite go schaffe, ound wo–n Aaspruch stéled a dië Inschtroumànt, wo me hutzoutaag àifach brouhchi fur en zytgmèuhsse–n Ounderricht, en Poschte–n aw, wo–n er mouës stàndig ouf dië heuhche–n Empfintlichkàite–n ound éérgyzige Rivalitèète vo Kunschtler Rucksicht nèè, ound éérscht na en Poschte, wo–n àim chouhm dië Loorbéére–n ybringt vo–n eme–n ariviërte Solischt. Es isch euppedië scho gspàssig, wië–n en Màntsch zwaar scho cha wusse, was en bi me pstimte Schritt erwaartet, aber glych neud imstand isch, sych voorzstéle, waas dànn wurkli–ch ouf en zouëchounnt; ound wië gèèrn soo–n en Màntsch aanimmt, fur ihnn gàlti daas Ubel neuhd, wo me vo andere Luute hèèr ggheuhri, ound dèrig Schwirigkàite uberwindi èr dànn scho, oder aw, wië–n er sych es héérs Zyl ouhsmaalet im Kampf grad gàge dèrigi Hindernis. De Wolfgang Abderhalde psinnt sych ouf dië éérfurchtig Haltig vo sym Vatterhouhs gàgenuber de Koultour, ouf t'Achtig vor de geuttliche Mouhse wo t'Màntsche–n ouf e heuhcheri gàischtigi Stouhffe–n oufeziënd, ouf p'Béduutig vo de Mousyk fur t'Erziëig nametli vo jounge Màntsche, wië daas scho de Filosoof Aristoteles erchànnt héig. De Héld vo–n euïser Gschicht isch entschlosse; er wott ali syni Chréft, syn ganze Flyss, syni ganzi Ouhsdouhr in Diënscht légge vo de Fèurderig vo dère hàilige Koultour. – Ér chounnt de Poschte–n uber.
Èr sturzt si–ch ouf t'Arbet, wo–n em syn neuje Poschte–n ouhfgit. Das er am Morge fruë de–r éérscht im Schouëlhouhs isch ound z'Aabig spaat de létscht wo–n ousegaat ound na am Sounntig gaat go schaffe, nimmt er am Aafang gélasse hy ound erchlèèrt er syner Fraw, er muësi sych halt na yschaffe–n ound ales kàneléére. Daa tuuscht er si–ch alerdings. Grad wil er sych, sym Natouréll oder syne Ggwonete–n entspràchend, mit groossem Flyss ound volem Ysatz hinder t'Arbet macht, grad wil er 's wott psounders gouët mache, wirts imer schwiriger, mit syne–n Ouhfgabe fèrtig z'wèrde. Deby hàt èr sych dourchouhs uberlàit gghaa, wië–n er 's wéll aapacke. Mit em Làitsprouch "Gouvèrner, c'est prévenir" ubernimmt er dië Mousigschouël, wo–n er zwaar vom ounderrichte hèèr kànnt, wo–n em aber so freumd isch, wië–n ere–n Éxpédizjon en ounerforschte Kontinànt. Schliëssli hàt er bis doo chouhm Yblick gghaa in ali dië Ableuïff, in ali Aaforderige wo vo Schuëler, Léérer, Éltere, Liferante, Poublikoum, Politiker ound wàiss ych wèm souscht na ouf en zouë-cheumed. Zoum cheune voorsorge, mouë me–n aber wusse, waas ound wië, ound am béschte léért me 's kàne, soo tànkt de Wolfgang, wà me t'Arbet sàlber i t'Hand nimmt. Zoum Byspyl isch er am Stoundeplaan ound souëcht e Muglichkàit, fur das jéde Mousigléérer, jédi Mousiglééreri en Rouhm hàt, wo dië neuhtige–n Inschtroumànt paraat steund wië Orgle, Flugel, Tschémbalo, Schlagzuug ound was me souscht na neud àifach cha–n im Tram mitnèè; en Rouhm aw, wo–n i de Greuhssi aaggmàsse–n isch, so das vo me Schuëlerorcheschter aw ali Platz hànd zoum proobe, das fur Konzàrt de–r entspràchendé Saal nou fur ài Formazjon ouf 's Maal résèrviërt isch, ound dànn git's na Uëbigsruum z'vertàile. Dië àinte Léérer sind nou a pstimte Wouchetààg daa, anderi wider nou a de Vormittààg oder Namittààg, ound ouhsggràchnet wànd druu 's glych Tschémbalo am Zyschtig Namittaag. Wo–n er zmittst am ouhsràchne vo dèrige logistische Probléém isch, luutet en Béamte vom Kantoon aa, wil en fyrliche–n Aalaass mouës verschobe wèrde, en Aalaass ounder Mitwurkig vom Schuëlerorchéschter. A dèm Konzèrt lyt em Tiràkter Abderhalde vill, wil es zàigt de Politiker, das euppis pbotte wirt fur t'Soubvànzjoone. Sofort probiërt de Wolfgang, dië verantwortliche Léérer z'verwutsche. Dië sind natuurli grad ounapkeummli. Si wuured zrouggluute, hàisst's am Traat, aber 's Gsétz vo de–n erwaartete Télifoon spillt aus daa: dië cheumed nië. Also tèurff er neud vergàsse, das er glych na mouës Pschàid uberchoo. Dànn luutet er i t'Drouckeréi aa, wil 's Daatoum ouf de Proschpàkt ound ouf de Plakèuhtli, wo t'Schouël in Ouhftraag git, mouës ggànderet wèrde. Zéérscht isch pbsétzt, dànn wirt er druumaal wyterggwise, bis er àntli–ch a dië kompétànti Pèrsoon anechounnt. Nachane brouhcht er feuïf Minouhte, bis er wider wàiss, woo–n er i sym kompliziërte Stoundeplaan stàckepblibe–n isch, aber grad jétz luuted s' ous de Drouckeréi aa, me cheuni dië Ànderig scho mache, aber daas choschti, ound éérscht na séig en Stooss Plakèuhtli scho tdrouckt; dië muës natuurli t'Schouël à zale. En neuje Versouëch mit em Stoundeplaan wirt ounderbroche vo–n ere Mouëtter, wo sych chounnt uber e Lééreri cho béschwèère, wil ires Chind nanig daas Voortraagsstuckli tèurff uëbe, wo 's doch a me Familjefàschtli sétt cheune spile. De Hèr Abderhalde rafft ali Gédould zàme, zoum ablose, es séig dànn aw en Geutti a daas Fàschtli ygglade, en wichtige Maa ous de–r Indouschtry ound wo vill Wèrt ouf p'Mousig–Erziëig làit … ound wyter im Tàggscht Ound soo chounnt àis oum 's ander, ound de Làser cha sych frèuhge, eub dèè Tiràkter àigeli kà Sékrétèèrin héig. Moll, aber er wott ébe–n ales kàne, ales sàlber im Griff haa. Imerhy wott er e Spràchstound yrichte–n ound hofft, i–r ubrige Zyt cheun er oungsteuhrt schaffe. Daas klappt halt neud in ere Schouël, wo vili nou zou pstimte Zyte–n aawàsend sind, ound wà me dànn éérscht na fur sych de hééré Voorsatz hàt, me sàlber muës doch fur ali glych daa sy. Am Taag drouhf hàt de Wolfgang en Houhffe Zyt ygsétzt fur syn Stoundplaan, aber na kàs Probléém ggleuhst. Defuur luutet dèè Béamt vom Kanton aa, dèè fyrli–ch Aalaass wèrd jétz doch neud verschobe. Trotz dère–n Erfaarig laat si de Wolfgang neud vo me Frund uberzuuge, dringendi Aafraage–n emaal z'schoubladisiëre, will si sych màischtens vo sàlber tuëgid erlédige. Èr hingàge bégàgnet de Problééme mit na méé Ysatz, na méé Pflichtbéwousstsy ound na méé Sàlbschtouhfopferig, ound droum gséét en syni Aatrowti jé lènger jé wéniger. Im Aafang isch si na oungluckli dewàge. Dànn mèrkt si, das si im Aaavaltskoléktyv gouëti Kontakt hàt, intràssanti Ouhfgabe–n ound éérscht na gouët verdiënt. Aw sy wirt jé lènger jé méé ggforderet ound mit Erfolg béloont, ound soo verbringt aw sy iri Zyt imer liëber i dère–n Aavaltspraxis. Chind sind ja kàni choo, ound so mouës halt aw irem Làbe t'Arbet de–r Inhalt gèè, oder das Éhépaar làischtet sych tuuri Fèrje womugli–ch i frèumde Kontinànte, Fèrje, vo déne me–n erscheupft ound mit liëcht aaggriffner Ggsoundhàit in Alltaag zrouggchounnt.