Boundesraatswaal
Es Gsprèuhch vom Hàini Habicht, em Reubi Raab ound em Chàschpi Cheuïzli.
Hàini Habicht: Jétz hàt dië SVP de Loo uberchoo fur ires ééwige Zwànge–n ound Treuïsse.
Reubi Raab: Waas hàisst daa Loo ? Es sind halt àifach wider emaal ali gàge dië wèèlerstèrchscht Partéi.
Chàschpi Cheuïzli: Na vili Luut gsénd daas ébefalls als Schlappe–n ound Niderlaag fur t'SVP. Mych aber tounkts, dië héiged daas wéle.
H.H.: Daas glawbsch ja sàlber neud !
R.R.: Wéle hàt daas t'SP zàme mit de Fraw Widmer–Schloumpf, uberhawpt hànd doch all andere dië Hinderruggsleri oufeggjoublet, wië wànn euïsi Schwyz ooni dië oundergaa muësst.
Ch.Ch.: Myr fallt àifach ouhf, wie de Brouhni Tounner ound de Bouschper Chlaager so–n e zfrideni Stimm hànd, wànn si vo–n irem Kampf oum g'Konkordanz réded ound phawpted, ine tèuged nou dië 75% Stimmburger làid, wo jétz neud im Boundesraat aaggmàsse vertràtte séiged. Dië teuhned scho ouhffélig ounbéruërt, wië ggoune–n ound neud verloore.
H.H.: Daas héisst na lang nuut.
Ch.Ch.: Jétz losed aber. Wàge waas list dië Partéi en Kandidaat ouhs, wo Dräck am Stàcke hàt, was s' ja békanntli ggwusst hànd, ound wàge waas macht daas chourz vor 's gilt ouhsggràchnet t'Wàltwouche poublik ? Dië sind ja souscht ééner ouf SVP Linje.
H.H.: Jaa ound ?
Ch.Ch.: Wàge waas chounnt's chourz vor em Waaltaag zou me Wurbel oum p'Basler Zytig, wo nou de Zwàck haa cha, t'Angscht vor ere Blocher–Méédjemacht schuure ?
R.R.: Daas isch doch klaar en Intryge gàg de Blocher.
Ch.Ch.: Wànn 's daas wèèr, waroum verplatzt dië Intryge fasch wië–n en Fourz ? Ound waroum bringt t'SVP als Ersatzmaa ouhsggràchnet àine, wo vo–n andere als wèèlbaar pstèuhtiget, aber wàg synere momàntaane Posizjon praktisch ouhsgschalte–n isch ?
R.R.: Si hànd doch mit dèm Kandidaat t'Hand ouhsgstréckt, si wéled p'Verantwortig mittrààge.
Ch.Ch.: Waroum gryffed s' dànn de Fréisinig Schnyder–Ame mit em Wàltsche–n aa ? Wo sowisoo kà Schangsse hàt. Ound wànn s' scho wànd de Jean François Ryn portiëre, ound dànn am Schlouss de Bourkhalter namaal bringe, wo ja en Romand a de Ràije wèèr, waroum mached s' daas neud ap mit em Fréisinn ound stéled en gàg sàbe–n ouhf ? Soo wië si 's aaggattiget hànd, hànd s' ja muëse de zwàit Sitz verluure. Droum glawb ych, daas hànd dië wéle.
H.H.: Jà Chàschpi, dou wottsch wider 's Graas gheuhre wachse.
R.R.: Ound fur waas séll daas "wéle verluure" gouët sy ? T'Opposizjon hàt èumel nië vill pbraacht.
Ch.Ch.: Dèèwààg hànd s' dië béschte–n Argoumànt fur e Volkswaal in Boundesraat.
H.H.: Waas fur Argoumànt ?
Ch.Ch.: Dië Parlamàntaariër séiged ja neud imstand, eub neud fèèïg oder neud ggwillt, fur en aaggmàssni Vertràttig vom greuhschte Wèèlerségmànt z'louëge, dië héigid blos iri chourzsichtige Spyli im Sinn. De Fraktzjoons–Schéff sàit ubrigenws sàlber i de Samschtigs–Roundschaw, dië Inizjatyve chèèm.
H.H.: Dànn sind s' aber scheuhn zuunisch !
R.R.: Aber mych tounkt daas glych koomisch. Grad bi de Stèndéraatswaale hàt doch dië Partéi muëse gséé, das si kà groossi Schangsse hàt bi Majorzwaale.
Ch.Ch.: Daa sàged s', si héiged wéle zàige, das me neud oumbédingt dië bishèèrige brouhchi pstèuhtige, sy wéled en àchti Waal voorschlaa.
H.H.: Sàged s' !
Ch.Ch.: Sàged s', aber als Nàbenéffàkt hànd s' es namaal e chli verdorbe mit de burgerliche Konkourànz. Und vor alem hànd s' probiërt, wië t'Stimig séig ound denaa iri Stratégy ouhstdànkt. Ébe wië s' en Syg ous ere Niderlaag miëchtid.
H.H.: Chàschpi, dou bisch ound blybsch en Fantascht.